صدمة التغيير.. حنفي بقى " نيفو " وخديجة " ديجا" والحرنكش " جولدن بيري "!
صدمة التغيير.. حنفي بقى " نيفو " وخديجة " ديجا" والحرنكش " جولدن بيري "!

احنا اتغيرنا بسرعه جدا من ساعة ما خديجه سابت وسط البلد و راحت سكنت ف كومباوند ف التجمع و بقي اسمها ديجا و بقت بتقول علي الكاكاو هوت شوكلت و بتفطر ولادها بينز اللي هوه فول مع باتون ساليه اللي اساسا اسمه بقسماط و بتغديهم جرين سووب مش ملوخيه و بعد الغدا بياخدوا شاور مش دش ومن ساعة ما جوزها الاستاذ حنفي بقي اسمه نيفو و بقي يقعد علي كافيه بدل القهوه و بقي يطلب كوفي ايشي تاركش و اميريكن وايشي لاتيه و اكسبرسو بدل الساده و ع الريحه..و صاحبه عبده بقي اسمه بودي و بيطلب الشاي تي باج و ايرل جراي بعد ما كان بيطلبه كشري سكر بره... و يروح البيت يغير البوكسر اللي هوه اللباس اساسا وقبل ما ينام يطلب من شوشو بنته اللي هيه اساسا عائشه تعمل شوجر كريب يعني فطيره سكر... احنا اتغيرنا من ساعة ما المصيف بقي ساحل و هاسيندا و مراسي بعد ما كان مراقيا و معموره و بيطاش و قنديل البحر بقي جيلي فيش و قرصته بقن Sun kiss و من ساعة ما ف الصيف بقي العري أوبن مايندد و الهدوم المقطعه بقت ستايل و المخدرات و السُكر بقوا روشنه و صياعه و كمان بقي عندنا سنجل مزر و ليبرل فازر و شباب فاكر..اتغيرنا من ساعة ما بقينا نقول oh my god بدل ما نقول يا دين امي و سمينا الحرنكش جولدن بيري و لقمة القاضي بقت greek donuts..اتغيرنا من ساعة ما المهرجانات بقت اغاني شعبيه و السبكي بقي أكبر منتج  و مصطفي كامل بقي نقيب الموسيقيين...احنا اتغيرنا من ساعه ما عايده بقت آيْدا و ايه بقت تايا و رانيا بقت هانياو هاله بقت تالا و ساره بقت تارا...احنا اتغيرنا من ساعة ما البنات بقوا بيكراشوا علي الولاد و الولاد بيتموحنوا علي البنات و من ساعة ما الراجل بقي مُز والبنت بقت رجوله..احنا اتغيرنا من ساعة ما الخلافات بقت اون لاين و الزعل بقي بلوك و الضحك بقي ايمو و العلاقات بقت سوشيال ميديا و كمان بقينا نكتب عربي بحروف انجليزي من باب الروشنه و اسمه الفرانكو اراب..!!.. اتغيرنا قوي .. بس ياترى هل هوه ده التغيير اللي احنا محتاجينه ؟!!

المصدر : الحكاية